નવી દિલ્હીમાં યોજાયેલી રાષ્ટ્રીય પરિષદમાં સન્માન; પ્રમુખ ભાવનાબેન ગોંડલીયાએ એવોર્ડ સ્વીકાર્યો, અમરેલી જિલ્લાનું ગૌરવ વધાર્યું
ધારી / નવી દિલ્હી : અમરેલી જિલ્લાના ધારી પંથક માટે ગૌરવ સમાન સિદ્ધિ પ્રાપ્ત થઈ છે. ધારી ખાતે કાર્યરત ‘ધારી કૃષિ ખેડૂત ઉત્પાદક અને પ્રોસેસિંગ સહકારી મંડળી’ને રાષ્ટ્રીય કક્ષાનો પ્રતિષ્ઠિત ‘CII FPO એક્સેલન્સ એવોર્ડ–૨૦૨૬’ એનાયત કરવામાં આવ્યો છે. કન્ફેડરેશન ઓફ ઇન્ડિયન ઇન્ડસ્ટ્રી (CII) તથા CII ફૂડ એન્ડ એગ્રીકલ્ચર સેન્ટર ઓફ એક્સેલન્સ (CII-FACE) દ્વારા ૨૩ ઓક્ટોબર, ૨૦૨૬ના રોજ નવી દિલ્હી ખાતે આયોજિત ‘CII FPO સમિટ એન્ડ FPO એક્સેલન્સ એવોર્ડ્સ–૨૦૨૬’ રાષ્ટ્રીય પરિષદમાં આ સન્માન એનાયત કરવામાં આવ્યું હતું. મંડળી વતી સંસ્થાનાં પ્રમુખ ભાવનાબેન ગોંડલીયાએ ઉપસ્થિત મહાનુભાવો અને કૃષિ ક્ષેત્રના અગ્રણીઓની હાજરીમાં એવોર્ડ સ્વીકાર્યો હતો.ધારી પંથકમાં કાર્યરત આ સહકારી મંડળી સ્થાનિક ખેડૂતોના આર્થિક ઉત્થાન, સશક્તિકરણ અને ખેતીને વધુ નફાકારક બનાવવાના હેતુથી સતત કાર્યરત છે. ખેતપેદાશોનું મૂલ્યવર્ધન, કૃષિ પેદાશોનું પ્રોસેસિંગ, સંગ્રહની સુવિધાઓ વિકસાવવા તેમજ ખેડૂતોને તેમની પેદાશોના યોગ્ય ભાવ મળે તે માટે બજાર સાથે સીધું જોડાણ સ્થાપિત કરવા જેવી પ્રવૃત્તિઓમાં મંડળીએ નોંધપાત્ર કામગીરી કરી છે.ખેડૂતોને સંગઠિત કરીને તેમની પેદાશોને વધુ મૂલ્યવાન બનાવવી, બજારલક્ષી અભિગમ અપનાવવો અને કૃષિ ક્ષેત્રમાં આધુનિક પદ્ધતિઓને પ્રોત્સાહન આપવું એ મંડળીની કામગીરીનાં મહત્ત્વનાં પાસાં છે. આ ઉપરાંત, મહિલા ખેડૂતોની ભાગીદારી વધારવા અને ટકાઉ કૃષિ પદ્ધતિઓને પ્રોત્સાહન આપવાના પ્રયાસો દ્વારા મંડળીએ ગ્રામ્ય અર્થતંત્રને મજબૂત બનાવવામાં યોગદાન આપ્યું છે.આ રાષ્ટ્રીય સન્માન અંગે મંડળીનાં પ્રમુખ ભાવનાબેન ગોંડલીયાએ જણાવ્યું હતું કે, “આ પુરસ્કાર માત્ર મંડળીનો નથી, પરંતુ ધારી અને સમગ્ર અમરેલી જિલ્લાના મહેનતુ ખેડૂત ભાઈ-બહેનોના પરસેવાનું પરિણામ છે. ખેડૂતો સંગઠિત થઈને પ્રોસેસિંગ અને મૂલ્યવર્ધન તરફ વળે તો ખેતી પણ નફાકારક ઉદ્યોગ બની શકે છે. આ એવોર્ડથી અમને ખેડૂતોના હિતમાં વધુ ઉત્સાહ અને નવી ટેક્નોલોજી સાથે કામ કરવાની નવી પ્રેરણા મળી છે.”ધારીની સહકારી મંડળીને રાષ્ટ્રીય સ્તરે મળેલા આ સન્માનથી અમરેલી જિલ્લાના સહકારી ક્ષેત્ર અને ખેડૂત સમુદાયમાં આનંદની લાગણી પ્રસરી છે. મંડળીની આ સિદ્ધિ સ્થાનિક ખેડૂતોની સંગઠિત શક્તિ, સહકારી ભાવના અને કૃષિ ક્ષેત્રમાં નવીન અભિગમનું પ્રતીક બની છે. આ સિદ્ધિ બદલ મંડળીના સંચાલકો, હોદ્દેદારો અને ખેડૂત સભાસદોને વિવિધ ક્ષેત્રોમાંથી અભિનંદન પાઠવવામાં આવી રહ્યાં છે.ધારીની આ સિદ્ધિએ અમરેલી જિલ્લાનું ગૌરવ વધારવાની સાથે અન્ય ખેડૂત ઉત્પાદક સંસ્થાઓને પણ સંગઠિત થઈને મૂલ્યવર્ધન, પ્રોસેસિંગ અને આધુનિક કૃષિ વ્યવસ્થાપન તરફ આગળ વધવાની પ્રેરણા પૂરી પાડી છે.
